Ad, soyad: Məsumə Əhədova
Təhsil: Hüquqşünaslıq (bakalavr), Bern Universiteti
Fəaliyyət dairəsi: Ədəbiyyat, kino, feminizm
Uğurlar: Hələ qabaqdadır
Kitab
– Sizin üçün kitab nədir?
– Yaxşı yoldaş, müşayiətçi.
– Kitabları niyə sevirsiniz?
– Məzmununa, yazarına, oxuduğum müddətdə yaşadıqlarıma görə.
– Hamıya məsləhət görə biləcəyiniz kitab?
– 2-3 illik intervallarla “Siddhartha” oxuyuram. Yaxşı təsir edir.
– Zibil qabına atmaq istədiyiniz və muzeydə saxlamaq istədiyiniz kitab?
– Evdəki kolxoz ədəbiyyatı nümunələrini atmışam. Nəyisə xüsusi saxlamaq, yığmaq istəyim isə yoxdur.
– Ən çox bəyəndiyiniz nəşriyyat və üzqabığı?
– Qalın cildli, üstündə ancaq müəllifin və əsərin adı yazılan köhnə nəşrlərdən xoşum gəlir. Köhnə kitab oxumağa üstünlük verirəm, bu baxımdan bir az ənənəviyəm.
Karandaş
– Sevimli yazıçılarınızın ortaq cəhəti?
– Ortaq cəhət sayılacaq qədər insanları yaxınlaşdırırsa, yaşadıqları yüzillik.
– Sizi ilhamlandıran yazıçılar
– Hekayə yazmaq texnikamı inkişaf etdirmək üçün daha çox bu janrda əsərlər oxuyuram. Kafka, Po, Kortasar ilə yaxınlıq hiss edirəm. Çexov, Mopassan, Bredberini çox sevsəm də, tamam fərqli enerji yayırlar.
– Birinci yoxsa sonuncu cümlə?
– Oxucu kimi birinci cümlə, yazıçı kimi sonuncu.
– Niyə yazırsınız?
– Qəhrəmanlarımdan özümə voodoo kuklası düzəldirəm; yaşamaqdan qorxduqlarımı və ya daşımaq istəmədiyim pis xatirələri onlara yükləyirəm. Gərək kimsə mənim yerimə əzab çəksin ki, mən davam edim.
– Oxumaq yoxsa yazmaq?
– İkisi də bir-birini dəstəkləyir, tamamlayır. Mütləq seçim etmək gərəksə, ikisi də yarımçıq qalacaq.
– Ən qısa hekayəniz?
– Qısa hekayəm yoxdur, hamısı yarımçıq qalmış uzun hekayələrdir.
– Qəhrəmanı olduğunuz əsərin janrı?
– Absurd hekayə.
– Protaqonistiniz haqqında danışın
– Həyatla güclü bağları olmayan biridir. Heç sevdiyi yemək, rəng də yoxdur.
Kitabı Karandaşla Oxuyanlar
– KKO-nun ən çox xoşladığınız və uğurlu saydığınız cəhətləri
– İşinizin davamlılığı, keyfiyyəti. Bu da hər halda KKO-cular arasında dostluq və doğma münasibətlərdən irəli gəlir. Xüsusilə “İlk & Son” işinizi çox bəyənirəm.
– KKO-nun bəyənmədiyiniz xüsusiyyətləri və saytda görmək istədiyiniz yeniliklər
– Bəyənmədiyim cəhəti yoxdur. Öz nəşrlərinizin daha da artmasını, tanınmasını istərdim. Uğurlar, KKO!
